CUF YAMTAKA RAIS KIKWETE KUUNDA TUME HURU KUCHUNGUZA MAUAJI YA MWANDISHI MWANGOSI.

 

Mwenyekiti wa Chama cha Wananchi CUF Prof. Ibrahim Lipumba.

Na.Mwandishi wetu.

Chama cha Wananchi (CUF) kimelaani mauaji ya Mwandishi wa habari wa kituo cha Channel Ten, Daudi Mwangosi huku kikimtaka Rais Jakaya Kikwete kubeba jukumu hilo ikiwa ni pamoja na kuunda Tume huru.

Katika tamko lao jijini Dar es Salaam, lililotolewa na Mwenyekiti wake Prof. Ibrahim Lipumba, Rais Kikwete anapaswa kuunda Tume hiyo ambayo itawashirikisha Watetezi wa Haki za Binadamu, Madaktari, Wakuu wa Jeshi la Polisi na Upelelezi pamoja na Wajumbe wengine wa vyama vya siasa.

Kwa mujibu wa Lipumba Tume ya Rais iwe na jukumu kubwa moja la kuchunguza mauaji hayo ambayo taarifa zake zinatatanisha hadi sasa, kwa lengo la kupata ukweli utakaofanyiwa kazi ya kukomesha mauaji yasiendelee kutokea.

Aidha kwa upande wa Shirikisho la Wafanyakazi nchini (TUCTA), limelaani tukio hilo na kusema pindi uchunguzi utakapokamilika na kubainika ukweli, basi wahusika wote wawajibishwe na wabebeshwe jukumu la kulipa fidia kwa familia ya marehemu.

Pia TUCTA, imelishauri jeshi la polisi katika kubuni mbinu mpya za kisasa ili kukabiliana na vurugu zinazotokana na harakati za kisiasa, kwani kuamini katika matumizi ya silaha pekee kamwe hakuwezi kuwa suluhisho la vurugu, matokeo yake ni kujenga usugu kwa Wananchi na matokeo yake hayatakuwa mazuri.